លិខិតប្រធាននាយកប្រតិបត្តិជូនចំពោះមាតាបិតា អ្នកអាណាព្យាបាលសិស្សអំពីវិស្សមកាលតូច ឆ្នាំ២០២៤
ថ្ងៃពុធ ៣ រោច ខែមិគសិរ ឆ្នាំរោង ឆស័ក ពុទ្ធសករាជ ២៥៦៨
រាជធានីភ្នំពេញ, ថ្ងៃទី១៨ ខែធ្នូ ឆ្នាំ២០២៤
ជូនចំពោះមាតាបិតា អ្នកអាណាព្យាបាលសិស្ស និងបុគ្គលិកអប់រំទាំងអស់ជាទីស្រឡាញ់រាប់អានដ៏ជ្រាលជ្រៅ!
តាងនាមស្ថាបនិក និងក្រុមប្រឹក្សាភិបាលនៃសាលាអន្តរជាតិ ស៊ី អាយ អេ ហ្វឺសត៍ ខ្ញុំសូមឆ្លៀតឱកាស នេះសម្ដែងនូវការកោតសរសើរ និងថ្លែងអំណរគុណយ៉ាងជ្រាលជ្រៅដល់លោកគ្រូអ្នកគ្រូ បុគ្គលិកអប់រំ និងប្អូនៗ សិស្សានុសិស្សដែលបានខិតខំប្រឹងប្រែងបំពេញកិច្ចការ និងសិក្សារៀនសូត្រអស់ពីកម្លាំងកាយ និងកម្លាំងចិត្ត។ ខ្ញុំក៏សូមថ្លែងអំណរគុណជូនចំពោះលោក លោកស្រីដែលជាមាតាបិតា អ្នកអាណាព្យាបាលសិស្ស ដែលតែងតែ ជួយគាំទ្រដល់ការសិក្សារបស់បុត្រធីតាក្នុងឆ្នាំសិក្សានេះ ក៏ដូចជាឆ្នាំសិក្សាកន្លងទៅ។
ខ្ញុំពិតជាមានក្ដីសោមនស្សរីករាយជាពន់ពេក ដែលប្អូនៗសិស្សានុសិស្សទទួលបាននូវលទ្ធផលសិក្សា យ៉ាងគាប់ប្រសើរក្នុងឆមាសទី១ នៃឆ្នាំសិក្សា២០២៤-២០២៥នេះ ហើយយើងខ្ញុំទាំងអស់គ្នាជាគណៈគ្រប់ គ្រងសាលាមានជំនឿចិត្តថា ប្អូនៗសិស្សានុសិស្សនឹងទទួលលទ្ធផលរឹតតែប្រសើរថែមទៀតក្នុងឆមាសទី២ខាង មុខនេះ។
បន្ទាប់ពីការបំពេញកិច្ចការ និងសិក្សារៀនសូត្រពេញមួយឆ្នាំយ៉ាងសស្រាក់សស្រាំ លោកគ្រូអ្នកគ្រូ បុគ្គលិកអប់រំ និងប្អូនៗសិស្សានុសិស្សទាំងអស់ ពិតជាត្រូវការពេលវេលា ដើម្បីសម្រាកលំហែ ចំណាយពេល វេលាជួបជុំគ្រួសារ ដើម្បីអាចត្រឡប់មកបំពេញកិច្ចការ និងសិក្សារៀនសូត្រវិញក្នុងឆ្នាំថ្មីប្រកបដោយថាមពល។
ក្នុងស្មារតីនេះ គណៈគ្រប់គ្រងសាលាបានសម្រេចអនុញ្ញាតឱ្យឈប់សម្រាកវិស្សមកាលតូច៖
សម្រាប់លោកគ្រូ អ្នកគ្រូ បុគ្គលិកអប់រំ ឈប់សម្រាកចាប់ពីរសៀលថ្ងៃទី២១ ខែធ្នូ ឆ្នាំ២០២៤ រហូតដល់ថ្ងៃទី៦ ខែមករា ឆ្នាំ ២០២៥ (ចូលបម្រើការងារវិញថ្ងៃទី៨ ខែមករា ឆ្នាំ២០២៥)។
សម្រាប់សិស្សានុសិស្ស ឈប់សម្រាកចាប់ពីថ្ងៃទី២១ ខែធ្នូ ឆ្នាំ២០២៤ រហូតដល់ថ្ងៃទី៦ ខែ មករា ឆ្នាំ២០២៥ ដោយថ្នាក់ខ្មែរកម្រិតវិទ្យាល័យនៅបន្តសិក្សាជាធម្មតានៅព្រឹកថ្ងៃទី២១ ខែធ្នូ ឆ្នាំ២០២៤ (ចូលសិក្សាវិញថ្ងៃទី៨ ខែមករា ឆ្នាំ២០២៥)។
នៅក្នុងអំឡុងពេលវិស្សមកាលតូចនេះ សាលាអន្តរជាតិ ស៊ី អាយ អេ ហ្វឺសត៍ គ្រប់សាខា នឹងបន្ត បើកដំណើរការនៅថ្ងៃទី២ និងថ្ងៃទី៣ ខែមករា ឆ្នាំ២០២៥ សម្រាប់ការសាកសួរព័ត៌មានអំពីការចុះឈ្មោះ សិស្ស ស្វាគមន៍មាតាបិតាអ្នកអាណាព្យាបាលសិស្សមកបំពេញទស្សនកិច្ចក្នុងបរិវេណសាលា និងទទួលការបង់ ប្រាក់ថ្លៃសិក្សាដោយសាលានឹងរៀបចំឱ្យមានបុគ្គលិកប្រចាំការទទួលស្វាគមន៍លោក លោកស្រី។
គណៈគ្រប់គ្រងសាលាសូមជូនពរ លោកគ្រូ អ្នកគ្រូ បុគ្គលិកអប់រំ ប្អូនៗសិស្សានុសិស្ស ព្រមទាំងលោក លោកស្រីជាមាតាបិតា អ្នកអាណាព្យាបាលសិស្សទាំងអស់ឱ្យទទួលបាននូវភាពសប្បាយរីករាយក្នុងការសម្រាក វិស្សមកាលតូចនេះ និងត្រឡប់មកវិញដោយមានការប្ដេជ្ញាចិត្តខ្ពស់ក្នុងការបំពេញកិច្ចការ និងការសិក្សារៀន សូត្របន្តទៀត។
ដោយក្ដីគោរពពី
ម៉ៃឃល វ៉ាល់
ប្រធាននាយកប្រតិបត្តិ
Commentaires